Lirik Sakét Nabi Sang Bungöng Kumbèe - Wafeut Nabi
Berikut adalah lirik syair Sakét Nabi Sang Bungöng Kumbèe atau dikenal dengan judul Wafeut Nabi. Syair ini dipopulerkan oleh Tgk Samunzir Husein.
Wafeut Nabi
Sakét Nabi sang bungöng kumbèe
Hana jan tathèe siat kamala
Na tamsé bungöng ka keunöng uroe
Meunan keuh bagoe tabôh umpama
Nabi neukheun ulôn nyoe wafeut
Karab neu-sukruet Malaikat ba
Öh ban neupeugah katoe ngön wafeut
Bandum meureut-reut tijoh ie mata
Di Abubakar neukheun lée rijang
Haté ka leukang kamoe nyoe dumna
Meunyoe ka tanlé Ya Rasulullah
Ka gadoh tuah dum asoe dônya
Teungöh nyan bandum baca seulaweut
Nabi pih wafeut Malaikat ba
Dum Malaikat neutren u bumoe
Di jeut-jeut sagoe Neuprèh Rabbana
Yôh goh geubalet Ya Rasulullah
Tamöng Fathimah neucôm bak dada
Beudoh A’isyah neucôm bak talak
Safiah nibak keunéng ban dua
Teuma Hafsah bak ubôn-ubôn
Maimunah neucôm geulinyueng dua
Di Juwairiah neucôm di gaki
Hèndôn di pipi antara mata
Teuma di Saudah dada siblah wie
Di teuntang haté neupeujab mata
Ramlah neucôm di miyub takue
Zainab lé laju di miyub dada
Hasan ngön Husén ban dua gobnyan
Paleut Janjôngan neusampôh muka
Öh ban kahabéh meukalon-kalon
Barô neupugom gapeuh bak muka
Seuleusoe balet muka Janjôngan
Nyang bôh bèe-bèwan Ali Murthadha
Nyang gulam ulèe Salman Farisi
Nyang gulam gaki nyan Abubakar
Umar Usman teulhèe ngön Ali
Kanan ngön kiri di teutang dada
Hasan ngön Husén neuseutot bagah
Lam buleun peut blah bandrang cuaca
Peusaré tanöh Usman ngön Ali
Teuma nyang plèe ie Saidina Umar
Salman Farisi nyang pula batèe
Neudong bak ulèe chit Abubakar
Demikianlah mengenai lirik syair aceh Wafeut Nabi, semoga dapat bermanfaat bagi semuanya.
Posting Komentar untuk "Lirik Sakét Nabi Sang Bungöng Kumbèe - Wafeut Nabi"
Anda Mendapatkan Manfaat Dari Informasi Ngaji Salafy? berkomentarlah dengan baik dan tidak menaruh link aktif.
Hormat Kami
Admin Ngaji Salafy